*वनोशीत ‘कृषी सखीं’चा बोर्डो धमाका! सुपारीवरील ‘कोळेरोग’ घालवण्यासाठी शेतकऱ्यांना मिळाले ‘संजीवनी’ प्रात्यक्षिक
(दापोली- प्रतिनिधी: सागर गोवळे.)
*दापोली / वनोशी तर्फे पंचनदी*: सुपारीच्या पिकावर एकाधिकार गाजवून शेतकऱ्यांच्या नाकी नऊ आणणाऱ्या घातक ‘कोळेरोगा’वर (फळकूज) आता ‘कृषी सखीं’नी थेट सर्जिकल स्ट्राईक केला आहे! डॉ. बाळासाहेब सावंत कोकण कृषी विद्यापीठाच्या ग्रामीण कृषी जागरूकता कार्यानुभव (RAWE) उपक्रमांतर्गत, वनोशी तर्फे पंचनदी येथील प्रयोगशील शेतकरी श्री. मंदार देपोलकर यांच्या बागेत कृषी सखी गटातील विद्यार्थिनींनी ‘१% बोर्डो मिश्रण’ तयार करण्याचे धडाकेबाज प्रात्यक्षिक सादर करून परिसरातील बागायतदारांची मने जिंकली.
पावसाळ्यात सुपारी बागायतदारांसाठी डोकेदुखी ठरणाऱ्या बुरशीजन्य रोगांचा नायनाट करण्यासाठी योग्य प्रमाणात आणि अचूक पद्धतीने बोर्डो मिश्रण कसे बनवावे, याचे ‘लाइव’ प्रात्यक्षिक या विद्यार्थिनींनी करून दाखवले.
असं बनवलं १% बोर्डो मिश्रण (संजीवनी फॉर्म्युला):
साहित्य: १ किलो मोरचूद, १ किलो चुना, १०० लिटर पाणी आणि प्लास्टिकच्या बादल्या.
कृती: ५० लिटर पाण्यात १ किलो मोरचूद आणि दुसऱ्या ५० लिटर पाण्यात १ किलो चुना स्वतंत्रपणे विरघळवण्यात आला. त्यानंतर चुन्याच्या द्रावणात मोरचूदचे द्रावण हळूहळू ओतून लाकडी काठीने ढवळत एकजीव, अत्यंत प्रभावी जंतूनाशक मिश्रण तयार करण्यात आले.
शेतकऱ्यांना महत्त्वाच्या टीप्स आणि दक्षता:
फवारणी करताना लोखंडी भांड्यांचा वापर पूर्णपणे टाळणे, दोन्ही द्रावणे नेहमी स्वतंत्र तयार करणे आणि फवारणी करताना मास्क व हातमोजे वापरून फक्त ताज्या द्रावणाचाच वापर करणे का गरजेचे आहे, याचे मोलाचे तंत्रज्ञान कृषी सखींनी शेतकऱ्यांना सोप्या भाषेत पटवून दिले.
या ‘कृषी सखीं’चा धमाकेदार पुढाकार:
या यशस्वी प्रात्यक्षिकाचे आयोजन कृषी सखी गटातील विद्यार्थिनी कु. संजना जंगले, कु. शबरी चव्हाण, कु. मधुजा घडशी, कु. पायल मोरे, कु. रिंकू बाजीया, कु. तरला श्रीदेवी, कु. दिविलीयू, कु. देवीप्रिया पी. टी., कु. श्रीलया एम., कु. मुस्कान कसोटीया आणि कु. नित्या राज यांनी अत्यंत उत्साहात केले.
दिग्गजांचे मार्गदर्शन व कौतुकाचा वर्षाव:
या उपक्रमाला कृषी विद्यापीठाचे सहयोगी अधिष्ठाता डॉ. रमेश कुंकरकर, RAWE समन्वयक डॉ. अशोक चव्हाण, केंद्र प्रभारी डॉ. विजय देसाई, विषय तज्ञ डॉ. परेश पोटफोडे, तसेच कार्यक्रम अधिकारी डॉ. आशिष शिगवण व डॉ. प्रवीण झगडे यांचे मोलाचे मार्गदर्शन लाभले.
विद्यार्थिनींच्या या थेट शेतावर जाऊन दिलेल्या प्रात्यक्षिकामुळे स्थानिक सुपारी बागायतदारांना मोठा दिलासा मिळाला असून, वनोशी परिसरातील शेतकऱ्यांकडून या ‘कृषी सखीं’वर कौतुकाचा भरभरून वर्षाव होत आहे!
