चिपळूण : चिपळूणच्या सहकार क्षेत्रात आपल्या कार्यातून स्वतंत्र ठसा उमटविणारे चिपळूण नागरी सहकारी पतसंस्थेचे संस्थापक व अध्यक्ष सुभाषराव चव्हाण यांच्या ७१व्या वाढदिवसानिमित्त संस्थेच्या वतीने अभिष्टचिंतन स्नेहसोहळ्याचे आयोजन करण्यात आले आहे. सोमवार, दि. ७ सप्टेंबर २०२६ रोजी सकाळी १० वाजता बहादूरशेख नाका येथील सहकार भवनातील सहकार सभागृहात हा कार्यक्रम होणार आहे.
सुभाषराव चव्हाण यांच्या वाढदिवसानिमित्त आयोजित हा कार्यक्रम केवळ अभिष्टचिंतनापुरता मर्यादित न राहता चिपळूण नागरी परिवाराचा स्नेहमेळावा आणि सहकार कार्यशाळा अशा व्यापक स्वरूपात आयोजित करण्यात आला आहे. त्यामुळे या कार्यक्रमाला सहकार क्षेत्राच्या दृष्टीनेही विशेष महत्त्व प्राप्त झाले आहे.
चिपळूण नागरी सहकारी पतसंस्थेच्या माध्यमातून सर्वसामान्य सभासद, ठेवीदार आणि ग्राहकांच्या आर्थिक गरजा लक्षात घेऊन सहकाराच्या माध्यमातून आर्थिक सक्षमीकरणाला चालना देण्याचा प्रयत्न करण्यात आला आहे. संस्थेच्या वाटचालीत संस्थापक अध्यक्ष म्हणून सुभाषराव चव्हाण यांनी दिलेले नेतृत्व, सहकार क्षेत्रातील त्यांचा अनुभव आणि संस्थेच्या विकासासाठी केलेले सातत्यपूर्ण प्रयत्न यांचा गौरव या सोहळ्यात करण्यात येणार आहे.
विशेष म्हणजे, कार्यक्रमासाठी सहकार क्षेत्रातील अनुभवी मान्यवरांची प्रमुख उपस्थिती लाभणार आहे. सेवानिवृत्त अपर आयुक्त तथा सहसचिव, सहकार व पणन वस्रोद्योग मंत्रालय, मुंबई, एस. बी. पाटील तसेच महाराष्ट्र राज्याचे माजी सहनिबंधक, लेखापरीक्षण, पुणे, तानाजी कवडे यांची प्रमुख उपस्थिती राहणार आहे.
संस्थेच्या संस्थापक अध्यक्षांचा वाढदिवस आणि त्यानिमित्त सहकार कार्यशाळा असा दुहेरी उद्देश असलेला हा उपक्रम चिपळूण नागरी सहकारी पतसंस्थेच्या सहकाराशी असलेल्या बांधिलकीचे प्रतीक मानला जात आहे. व्यक्तीच्या वाढदिवसाला संस्थेच्या कार्याचा आणि सहकाराच्या मूल्यांचा संदर्भ जोडल्याने या कार्यक्रमाला सामाजिक व संस्थात्मक स्वरूप प्राप्त झाले आहे.
या स्नेहसोहळ्यास संस्थेचे सर्व सभासद, हितचिंतक, ठेवीदार तसेच सहकार क्षेत्रातील कार्यकर्त्यांनी मोठ्या संख्येने उपस्थित राहावे, असे आवाहन चिपळूण नागरी सहकारी पतसंस्थेचे संचालक व कर्मचारी परिवाराने केले आहे. हा अभिष्टचिंतन सोहळा यशस्वी करण्यासाठी मुख्य कार्यकारी अधिकारी सौ. स्वप्ना यादव यांच्या मार्गदर्शनाखाली सर्व अधिकारी व कर्मचारी वर्ग मेहनत घेत आहेत.
